قصيدة الدشرة...

djamal الثلاثاء أبريل 21, 2009 12:44 am

أبقاي على خير يا هذا الدشرة ** يا لي غاشيها غير فلان و فلان
راني حالف مانولي ذا المرة ** و لو نموت في صحرا عطشان
نعشر بر الروم و بلاد الكفرة ** و لا نعيشر بر الشمايت و الرعيان
لحديث تنوفيق و الضحكة صفرة ** و الصحبة تحيا و تفنى بالقضيان
بلسانو يعطيك قنطار مصرة ** و الحيلة متلبدة تحت البيطان
بالرشوة تلقاه ماشي للعمرة ** و يصلي في البيت في آخر رمضان
و يولي بكلاح و عباية صفرة ** و يعطيها للزور و كلام البهتان
يحلفلك ليمين قداه مرة ** و يحلف بالكعبة و يحلف بالقرآن
و يحرم البزوز و يحرم لمرا ** و غير يصد عليك تلقى كذبو بان
أبقاي على خير ياهذا الدشرة ** للي يحكمها غير الجاهل و الخوان
تلقى لي ملو غبار السبورة ** للسياسة داخلين بلا سلطان
المرفوعة تاليتــها مجرورة ** و العطف يوروه غير لفلان و فلان
و الفعل المجهول مبني على للكسرة ** و اسماء الخمسة يديرو ليهم شان
تلقى المير حمار و النايب بقرة ** و المجلس تعبان يختل في تعبان
ما تفرز أمي على واحد يقرا ** و لا تفرز صاحي على واحد سكران
كي تسمع لحديثهم عند الهدرة ** تقول أنت لبطال هاذو و الشجعان
لو تعجنهم ما يجو في صاق مرا ** و لو توزنهم ما يوفولك ميزان

صاحب القصيدة هو جلول الجلجلي مهندس معماري من ولاية البيض...
وهذه القصيدة تعبر عن حالة اليأس التي يواجهها بعض الشباب الجزائري نظرا للتهميش والإقصاء...
و خير دليل على ذلك قوافل الحراقة والمنتحرين...
بلد الخيرات و البترول ويعيش أهلها البأس و الفقر...
بلد المليون والنصف مليون من الشهداء و يعيش أهلها الحقرة و المحسوبية...
على كل حال ...
الله يلطف بينا...آمين